بنو کې د قرآنکریم فضیلت په اړه علمي سیمینار وړاندې شو

د بغلان اطلاعاتو او کلتور ریاست له لوري بنو ولسوالۍ کې د قرآنکریم اهمیت، فضیلت او قرآنکریم د مسلمانانو په ژوند کې د هدایت کوونکي رول په اړه علمي سیمینار وړاندې شو.
په دې سیمینار کې لسګونو تنو دیني علمای کرامو، قومي مخورو او ګڼ شمېر ځوانانو ګډون کړی وو.
د اطلاعاتو او کلتور رئیس وویل: قرآنکریم د پیغمبر (ص) تر ټولو لویه معجزه دی، چې د بشریت د هدایت لپاره نازل شوی او د قرآنکریم د لارښوونو څخه پیروي کول د انسان د دنیا او اخیرت سعادت او نیکبختیو لامل کیږي.
نوموړي زیاته کړه، مسلمانان باید د قرآنکریم د لارښوونو او مفاهیمو څخه په ښه درک کولو سره دا په خپل فردي او ټولنیز ژوند کې عملي کړي، ترڅو له ایمان څخه یو باخبره ټولنه جوړه شي.
د سیمینار په لړ کې یو تن دیني عالم په قرآنکریم د عمل کولو او تلاوت کولو فضیلت په اړه خبرې وکړې او ویې ویل: د مسلمانانو لپاره قرآنکریم د هدایت او رحمت سرچینه ده او په لارښوونو یې عمل د فرد او ټولنې د اصلاح لامل کیږي.
د سیمینار په پای کې ګډونوالو د ځوانانو لا ښه پوهاوي په موخه د ورته علمي او دیني سیمینارونو پر جوړولو ټینګار وکړ.

۱۴۴۷/۹/۲۰ هـ ق