جوزجان کې د (ځوان فکر، روښانه راتلونکې) په نامه فکري او فرهنګي پروګرام ترسره شو
د جوزجان اطلاعاتو او کلتور ریاست له لوري او د البرز علمي او فرهنګي ادارې په همکاریو په شبرغان ښار کې د (ځوان فکر، روښانه راتلونکې) تر سرلیک لاندې د ځایي امارتي ادارو د مسؤلینو او سلګونه تنو ځوانانو په شتون کې فکري او فرهنګي پروګرام ترسره شو.
د جوزجان والي مولوي عبدالله سرحدي د دې پروګرام د جوړوونکو له هڅو څخه مننه وکړه او د ټولنې په پرمختګ کې یې د ځوانانو پر رغنده رول ټینګار وکړ. نوموړي وویل: ځوانان د هېواد اساسي پانګه ده او که زدهکړو، اخلاقو او سالم فکر ته یې پاملرنه وشي، نو ټولنې ته به روښانه راتلونکی برابر کړي. ښاغلي سرحدي زیاته کړه، چې حکومتي مسوولین له هغو پروګرامونو څخه ملاتړ کوي چې د ځوانانو د فکري او فرهنګي ودې په موخه جوړېږي.
دغه راز نور ګډونوالو هم په خپلو ویناوو کې د پوهاوي، یووالي، مسوولیت منلو روحیې د پیاوړتیا او د هېواد د ثبات، پرمختګ او آبادۍ په برخو کې د ځوانانو پر رول ټینګار وکړ.
ګډونوالو زیاته کړه، چې د ځوانانو لپاره د فکري او فرهنګي فضاوو رامنځته کول کولای شي د سالمو افکارو د روزنې، له ټولنیزو ستونزو د لرې پاتې کېدو او د هېواد د راتلونکي په جوړولو کې د ځوانانو د فعال ګډون زمینه برابره کړي.
۱۴۴۷/۸/۲ هـ ق
