د اطلاعاتو او کلتور رياست اړوند وړیا ښوونیز مرکز څخه لسګونه تنه زده کوونکي فارغ شول

د نورستان ولایت د اطلاعاتو او کلتور ریاست اړوند وړیا ښوونیز مرکز د پنځمې دورې څخه په انګلیسي ژبې، کمپیوټر، ژورنالیزم او ویناوالۍ برخو کې له درې میاشتنيو ټولګیو څخه ۶۰ تنه زده کوونکي فارغ شول.
د اطلاعاتو او کلتور رئیس مولوي سميع الحق حق بیان وویل: یاد ښوونیز مرکز د دریو میاشتو په موده کې د نورستان د بېلابېلو سیمو ځوانانو ته د مسلکي ښوونکو په مرسته د انګلیسي ژبې، کمپیوټر، ژورنالیزم او ویناوالۍ په برخو کې زده کړې ورکړې دي، چې دغه لړۍ به دوام ولري او په راتلونکي کې به نور ځوانان هم ټولنې ته د خدمت په موخه وروزي.
په یاده غونډه کې ویناوالو فارغو شويو زده کوونکو ته د مبارکۍ ویلو ترڅنګ د علم په ارزښت خبرې وکړې او دوی ته یې سپارښتنه وکړه، چې له خپلو زده کړو څخه سالمه ګټه واخلي او تر نورو يې هم ورسوي.
د ویناوالو په وینا؛ یوه ټولنه د علم په مټ وده کولای شي، ځوانان باید د خپلو وړتیاوو د پیاوړتیا له لارې د هېواد د خدمت او پرمختګ لپاره هڅې وکړي، دغه ډول ښوونیز پروګرامونه د ځوانانو د روزنې او د سالمې ټولنې په رامنځته کولو کې مهم رول لري.

۱۴۴۷/۳/۲۵ هـ ق