د اطلاعاتو او کلتور وزير رسنيز مسؤليت ډېر مهم دی، باید مسؤلانه برخورد وشي
پنجشنبه ( ۲۲ د رجب ۱۴۴۶) د اطلاعاتو او کلتور وزارت د خپرونو چارو معينيت اړوند اطلاعاتو ته د لاسرسي رياست له لوري د وزارتونو او مستقلو ادارو د وياندويانو او د رسنيو له مسؤلينو او استازو سره د همږغۍ غونډه کې د ياد وزارت وزير الحاج ملا خیرالله خیرخواه صاحب د غونډې ګډونوالو ته د وينا پرمهال وویل: رسنيز مسؤليت ډیر مهم مسؤليت دی، باید داسې مسؤلانه برخورد وکړو، چې له خپل مسير سره مو مطابقت ولري، باید متضاد شيان نشر نه کړو ځکه چې ټولنه له خپل اصلي مسير څخه منحرفوي، ټول باید خپل اصلي استقامت تعقیب کړو او له افراط او تفريط څخه ځان ساتنه وکړو.
محترم خيرخواه صاحب زياته کړه؛ په يو شمېر هېوادونو کې په رسنيو ډير سخت قیودات وضع شوي دي، خو برعکس اسلامي امارت له رسنيو ملاتړ کوي او له دوی څخه يې په هر ډګر کې دفاع کړې ده او بيا يې هم کوي، د اسلامي امارت په راتګ سره د هېواد ملي ګټې خوندي شوي دي، امارت د ټولو افغانانو ګډ کور دی، ستونزې به په ګډه ختموو هېواد مو له ډيرو ستونزو راتېر شوی دی، درې امپراطورۍ پکښې ماتې شوي دي، باید له تېر وخت څخه تجربه واخلو او د هيواد د ابادۍ او پرمختګ لپاره اوږه په اوږه کار وکړو.
۱۴۰۳/۱۱/۴ ل
۲۰۲۵/۱/۲۳ ز
