د مولانا جلال الدين بلخي د پلار د خانقا ترميم او بیارغونې په موخه د مسلکي کميټې ناسته وشوه
د اطلاعاتو او کلتور وزارت د فرهنګ او هنر معین مولوي عتیقالله عزیزي په مشرۍ د مولانا جلال الدین بلخي د پلار خانقاه چې بلخ ولايت کې موقعيت لري، د ترمیم او بیارغونې په موخه د مسلکي کمېټې ناسته ترسره شوه.
ناسته کې د اغاخان بنسټ د فرهنګي برخې رئیس انجینر اجمل میوندي، د هافو موسسې رئیس انجینر جاوید، د ښارجوړونې وزارت د تاریخي ښارونو د جوړونې رئیس انجینر محمود دوست، او د اطلاعاتو او کلتور وزارت د تاریخي آبداتو رئیس انجینر حسیب نسیمي ګډون درلود.
په یاده ناسته کې د تیکا موسسې له لوري بلخ کې د مولانا صاحب د پلار خانقاه بیارغونې او د شاوخوا ساحې منظمولو په موخه د یو پارک جوړېدو پلان وړاندې شو، چې مسلکي کمېټې غړو پرې هر اړخیز بحث وکړ.
د اطلاعاتو او کلتور وزارت د فرهنګ او هنر معین مولوي عتیقالله عزیزي وویل: د تاریخي او فرهنګي آبداتو ساتنه، ترمیم او معیاري بیارغونه د دولت له مهمو مسؤلیتونو څخه ده او ټینګار یې وکړ چې ټولې چارې باید د تاریخي اصالت، فرهنګي ارزښت او نړیوالو معیارونو په رڼا کې ترسره شي، نوموړي له کمېټې وغوښتل چې د ترمیم د طرحې تخنیکي ارزونه نوره هم پیاوړې کړي او عملي کارونه په تدریجي او علمي ډول تنظیم کړي.
د ناستې په پای کې پرېکړه وشوه، چې د وړاندې شوې طرحې تخنیکي اصلاحات به د مسلکي کمېټې د سپارښتنو پر بنسټ بشپړ شي او د تیکا مؤسسي او اړوندو لورو نظریات دي واوریدل شي.
۱۴۴۷/۶/۲۳ هـ ق
