سمنګان کې د امارتي ادارو ویاندویانو، رسنیو مسؤلینو او خبریالانو ترمنځ د همغږۍ ناسته وشوه

د سمنګان ولایت د اطلاعاتو او کلتور ریاست له لوري د خبریالانو د خوندیتوب کمېټې په همکارۍ په ایبک ښار کې د رسنیو او امارتي ادارو ویاندویانو ترمنځ د اړیکو پیاوړي کولو په موخه د همغږۍ ناسته جوړه شوه.
په دې ناسته کې، د اطلاعاتو او کلتور رئیس مولوي فیروزالدین منیب د خبریالانو د فعال ګډون هرکلی وکړ او ویې ویل: دقیق او پر وخت اطلاع رسونه، دوه اړخیزو همکاریو ته اړتیا لري، ویاندویان او رسنۍ باید خلکو ته د اطلاع رسونې په موخه ګډ کار وکړي.
همدارنګه د اطلاعاتو آمر د سرخکان واکسین د راتلونکي کمپاین د پیل په اړه خبرې وکړې او له خبریالانو څخه یې وغوښتل چې دغه کمپاین ته پراخ پوښښ ورکړي، ځکه په ښه توګه اطلاع رسونه کولای شي، چې د ډیرو ماشومانو ژوند وژغوري.
د ناستې په لړ کې د امارتي ادارو ویاندویانو، رسنیو مسؤلینو او خبریالانو خپل ستونزې او وړاندیزونه شریک کړل، چې د اطلاعاتو او کلتور رئیس له لوري د ستونزو د حل او وړاندیزونو ته د رسیدو ډاډ څرګنده شو.
۱۴۴۷/۵/۶ هـ ق