له قلموالو مبارزو ځوانانو سره د همغږۍ غونډه وشوه

د پکتیا ولایت په اطلاعاتو او کلتور ریاست کې د ځوانانو چارو آمریت په هڅو د مصلحو او قلموالو مبارزو ځوانانو تر منځ د فکري مبارزې پیاوړتیا، یووالي، انسجام او همغږۍ په موخه غوڼده وشوه.
د اطلاعاتو او کلتور رئیس مولوي ثواب جان اسلام یار وویل: ځوانان باید د قلم له لارې د فکري مبارزې په برخه کې ډیر کار وکړي، د باطل په وړاندې د حق مبارزه کول غوره جهاد دی، د مسلمانو ځوانانو سوچ، فکر او هوډ باید دا وي، چې د باطلو افکارو او پروپاګند په وړاندې نه ستړې کېدونکې هلې ځلې وکړي او د اسلامي امت د ځوانانو یووالي او همغږۍ لپاره اعظمي هڅې وکړي، د اطلاعاتو او کلتور ریاست د ځوانانو لپاره فکري روزنې او مبارزې په برخه کې بېلابېل پروګرامونه جوړ کړي دي او لا هم هڅې کوي، چې لیکوالانو، شاعرانو، ځوانانو او زده کوونکو ته راتلونکي کې نور پروګرامونه هم جوړ کړي.
د غونډې په لړ کې د پوهنتون استاد احسان الله نظري له لورې د ځوانانو پر فکري روزنې، د فکري جګړې او په وړاندې یې د مبارزې لارې چارو باندې روزنیز سیمینار وړاندې شو.
ورپسې د غونډې ګډونوالو د ښې همغږۍ، یووالي، فکري او قلمي مبارزې لا ښه والي په موخه نظرونه او وړاندیزونه شریک کړل، چې د مسؤلینو له لوري ورته د هر راز همکارۍ داډ ورکړل شو.
په پای کې د اطلاعاتو او کلتور ریاست، ځوانانو چارو آمریت له لوري د مصلحو او قلموالو مبارزو ځوانانو کړنې د مننلیکونو په ډالۍ کولو سره وستایل شوې.

۱۴۴۷/۵/۱۱ هـ ق