له وړیا ښوونیز مرکز څخه لسګونه ځوانان فارغ شول
د بدخشان ولایت د اطلاعاتو او کلتور ریاست د ځوانانو چارو آمریت اړوند وړیا ښوونیز مرکز څخه ۸۵ تنه ځوانان د کمپيوټر زده کړو له شپږ میاشتنيو ټولګیو څخه فارغ شول.
د فراغت په مراسمو کې د اطلاعاتو آمر وویل: زده کړه د ژغورنې او پرمختګ وسیله ده، هغه ځوانان چې د علم لار نیسي، د ټولنې رڼاوې دي، هیله مند یو، چې شاهدان او،سو چې دغه ځوانان به په راتلونکي کې د داخلي سافټویرونو جوړوونکي او پراختیا ورکوونکي شي او هېواد ته به ستر ویاړونه ترلاسه کړي.
ورته مهال د یاد ښوونیز مرکز مدیر وویل: په تېرو شپږو میاشتو کې ۸۵ تنه ځوانان له کمپیوټر ټولګیو څخه فارغ شوي، دا مهال ۲۰۰ نور ځوانان د انګلیسي ژبې او ویناوالۍ په برخو کې په زده کړې بوخت دي، له ټولو زده کوونکو څخه غواړو چې له روښانه هدف سره، د زده کړې لاره تعقیب کړي.
د فراغت غونډې په لړ کې زده کوونکو د اطلاعاتو او کلتور ریاست له هڅو څخه مننه وکړه او ویې ویل: هیله لرو چې دا ډول پروګرامونه د ولایت نورو ولسوالیو ته هم وغځېږي، څو نور ځوانان هم له دې فرصته څخه ګټه واخلي.
۱۴۴۷/۴/۲۶ هـ ق
