لوګر کې لسګونو تنو ځوانانو ته روزنیز سیمینار وړاندې شو
د اطلاعاتو او کلتور وزارت اړوند د عامه کتابتونونو ریاست او د لوګر اطلاعاتو او کلتور ریاست په ګډو همکاریو لسګونو تنو ځوانانو ته (مطالعه څنګه د ژوند برخه وګرځوو؟) په نوم روزنیز سیمینار وړاندې شو.
د لوګر د اطلاعاتو او کلتور رئیس د یاد سیمینار موخه ټولنه کې په ځانګړي ډول د ځوان قشر ترمنځ د مطالعې دود پیاوړتیا یاده کړه او پر ځوانانو یې غږ وکړ، چې د مطالعې پراختیا برخه کې له شته فرصتونو څخه بشپړه ګټه پورته کړي.
دغه راز د عامه کتابونونو رئیس کتاب او مطالعه د ورځني ژوند پرمختګ په برخه کې بنسټیزه اړتیا یاده کړه او زیاته یې کړه؛ علماوو او اسلافو کتاب او مطالعې ته په ژوند کې ځانګړی وخت ورکړی وو، موږ ته په کار ده، چې د هغوی په پل، پل کیږدو، کتاب د ژوند ملګری کړو او د علم ترلاسه کولو لاره کې هر ډول تکلیف وګالو.
۱۴۴۷/۸/۲۸ هـ ق
