پکتیا کې د (پکتیا جرګه) په نوم یوې نوې خصوصي راډیو خپلې نشراتي چارې پیل کړې

د پکتیا اطلاعاتو او فرهنګ ریاست مسؤلین وایي چې په مرکز ګردیز کې د (پکتیا جرګه) په نوم یوې نوې خصوصي راډیو د ۸۹.۱ ایف ایم څپو کې خپلې نشراتي چارې پیل کړې.
د مسؤلینو په وینا د اطلاعاتو او فرهنګ ریاست د رسنیو پراختیا او پیاوړتیا ته ژمن دی او د یادې راډیو له جوړېدو څخه موخه د ولس غږ تر مسؤلینو رسول، په بېلابېلو برخو کې ولس ته اطلاع رسول او د فرهنګي ارزښتونو پیاوړتیا ده.
د اطلاعاتو او فرهنګ ریاست مسؤلینو د یادې راډیو فعالیت پیلول د رسنیز ډګر د پراختیا لپاره مهم ګام وباله او ټینګار یې وکړ، چې رسنۍ د عامه پوهاوي، ټولنیز یووالي او د ولسي ستونزو د انعکاس په برخه کې مهم رول لري.
د (پکتیا جرګه) راډیو د نشراتو مسؤل وویل: دغه راډیو به هره ورځ ۱۸ ساعته بېلابېلې خپرونې وړاندې کوي، چې په دغو خپرونو کې به د افغانستان اسلامي امارت لاسته راوړنو او فعالیتونو رسنیز کول ترڅنګ، دیني، سیاسي، فرهنګي، روغتیایي، ښوونیز او ټولنیزې خپرونې وړاندې کول هم شاملې وي.
نوموړي زیاته کړه، د جرګه راډیو کارکوونکي هڅې کوي، چې د ولس غوښتنو ته په اصولي بڼه انعکاس ورکړي او د رسنیو له لارې د خلکو او مسؤلینو ترمنځ د همغږۍ فضا رامنځته کړي.
د یادونې وړ ده، چې د اسلامي امارت له واکمنېدو وروسته په پکتیا ولایت کې دا پنځمه راډیو ده، چې په رسمي ډول فعالیت پیلوي.

۱۴۴۷/۱۱/۲۲ هـ ق