پکتیا کې ګڼ شمېر ځوانانو ته فکري او اصلاحي سیمینار وړاندې شو
د پکتیا اطلاعاتو او کلتور ریاست له لوري د الکوثر فکري او فرهنګي ادارې په همکارۍ ګڼ شمېر زده کوونکو او ځوانانو ته فکري او اصلاحي سیمینار وړاندې شو، چې موخه يې په اسلامي ټولنه کې د ځوانانو د مسؤلیتونو روښانه کول او د عالیقدر امیرالمؤمنین (حفظهالله) له لوري د ناوړه دودونو او انساني قاچاق د مخنیوي په تړاو د صادر شویو فرمانونو او حکمونو د تطبیق په اړه عامه پوهاوی و.
ویناوالو د ځوانانو پر مسؤلیتونو او ټولنه کې د هغوی پر ارزښتناکه رول خبرې وکړې او ویې ویل: د غوره راتلونکي لپاره د فکري روزنې دا ډول سیمینارونه بنسټیز اهمیت لري.
مسؤلینو د سیمینار ګډونوالو ته د عالیقدر امیر المؤمنین (حفظه الله) د احکامو، فرامینو او هدایاتو تطبیق او تر نورو رسول، په ځانګړې توګه د ناوړه دودونو او انساني قاچاق مخنیوي فرمانونو په اړه هراړخیزې خبرې وکړې او زیاته کړه؛ د دیني او عصري زده کړو پیاوړتیا د هېواد، اسلام پالنې او پرمختګ لپاره اړینه دي.
د سیمینار په پای کې د فکر جوړونې او روزنې پر اهمیت ازاد بحث او خبرې هم وشوې.
۱۴۴۷/۸/۱۶ هـ ق
