د اطلاعاتو او کلتور وزير د رسنيزو بنسټونو له استازو سره وکتل

یکشنبه ( ۲ د جمادی الثانية ۱۴۴۷) د اطلاعاتو او کلتور وزير ښاغلي شيخ شيراحمد حقاني صاحب په خپل کاري دفتر کې د رسنيزو بنسټونو له استازو سره په هيواد کې د خبريالانو او رسنیزو چارو د ودې، پراختیا او ستونزو ته د رسيده ګۍ په موخه وکتل.
یاده ناسته کې د باختر خبري آژانس رئيس مولوي ضیاءالحق حقمل، د افغانستان د خبریالانو د اتحاديې مشر حفیظ الله بارکزي، د خبريالانو د ملي کور مشر محمد یاسين متین، د ازادو خبریالانو ټولنې مشر حجت الله مجددي او د نورو رسنيزو بنسټونو مشرانو او استازو ګډون کړی وو.
د ناستې په پيل کې د افغانستان د خبريالانو د ټولنې مشر حفیظ الله بارکزي او نورو مسؤلينو وویل: افغانستان د ټولو افغانانو ګډ کور دی، هر افغان باید خپله اړونده برخه کې ملي وجيبه ادا کړي، خبریالان او رسنۍ د ملت او دولت تر منځ د اړيکو پل دی، د ااا دې په هيواد کې د شته خبريالانو ستونزو ته رسيده ګي وکړي او د دوی لاسنيوی دې وکړي، خبریالان اسلامي او ملي ارزښتونو ته ژمن دي، د واقعيتونو په خپرولو سره نه پرېږدي، چې معلوماتي خلا رامنځته او دښمنې کړۍ ورڅخه ناوړه استفاده وکړي، د خبریالانو په نړيوالو کنفرانسونو کې د ااا لاسته راوړنې شريکې شوي دي.
همدا راز د یادو رسنيزو بنسټونو مسؤلينو د افغان خبريالانو او ولايتي رسنيو د وضعيت او په اوسنيو شرايطو کې د خبريالانو او رسنيو د دندو او همغږيو په اړه تفصيلي خبرې وکړې.
د اطلاعاتو او کلتور وزير ښاغلي شيخ حقاني صاحب د خپلو خبرو په ترڅ کې یادونه وکړه، چې اوسنی نظام هيواد ته وفاداره او تر بل هر څه ورته ملي ګټې ارزښتمنې دي، اسلامي نظام د عمل نظام دی، رسنۍ او نظامونه د يو او بل په ملاتړ دوام کوي، د اطلاعاتو او کلتور وزارت له رسنيو څخه ملاتړ کوي، د رسنيو د بريښنا او فریکونسي ستونزو ته د رسيده ګۍ په موخه د ریاست الوزراء عالي مقام ته وړانديز شوی، چې تر منظورېدو وروسته به يې رسنۍ په جريان کې شي، د اطلاعاتو او کلتور وزارت د رسنيو د ملي کور حیثیت لري او دروازې يې هر وخت پرته له کوم محدوديت څخه د خبریالانو او رسنيو پرمخ خلاصې دي.

۱۴۰۴/۹/۲ هـ ل