د (امام ابوحنیفه باید وپېژنو) کتاب لوستنې سیالۍ پایلې اعلان شوې
د فاریاب اطلاعاتو او کلتور ریاست د یوې علمي او فرهنګي ادارې په همکارۍ په میمنې ښار کې د (امام ابوحنیفه باید وپېژنو) په نوم د کتاب لوستنې سیالۍ چې څه موده وړاندې د ۳۵۰ تنو ګډونوالو ترمنځ ترسره کړې وه، پایلې یې اعلان او مخکښ ګډونوال یې په بېلابېلو ډالیو وستایل شول.
د دې سیالۍ د جوړولو څخه موخې د ځوانانو ترمنځ د مطالعې د کلتور پیاوړتیا، د ځوانانو د فکري ودې ملاتړ او د امام اعظم ابوحنیفه(رحمهالله) د ژوندلیک، علمي خدمتونو او لوړ علمي مقام سره د ځوانانو بلدتیا وبلل شوې، ټینګار وشو، چې دا ډول فرهنګي او د کتاب لوستنې پروګرامونه به په دوامداره توګه جوړ شي.
دغه راز د پروګرام ګډونوالو د ځوانانو د فکري ودې لپاره د فرهنګي پروګرامونو پر اهمیت او د وخت پر سالمې استفادې ټینګار وکړ.
د یادونې وړ ده، چې د یادې سیالۍ لومړي مقام ګټونکي ته یو پایه کمپیوټر، دوهم مقام ګټونکي ته یو سيټ ځیرک موبایل او د درېیم څخه تر اتم مقامونو ګټونکو ته نغدي پیسې او ستاینلیکونه ورکړل شول.
۱۴۴۷/۸/۹ هـ ق
