د ځوانانو چارو ریاست له اکتید مؤسسې سره د همکارۍ هوکړهلیک لاسلیک کړ
د اطلاعاتو او فرهنګ وزارت د جهادي آثارو ساتنې لوی ریاست اړوند د ځوانانو چارو ریاست له اکتید (ACTED) نړیوالې مؤسسې سره د ۱۲ میاشتو په موخه د څه باندې ۳۲۴ زره امریکايي ډالرو په ارزښت د همکارۍ هوکړهلیک لاسلیک کړ.
د ځوانانو چارو رئیس مولوي سید محمد داوود آغا د هېواد د ځوانانو د ملاتړ په برخه کې د اکتید مؤسسې د فعالیتونو او همکاریو قدرداني وکړه او د کار بازار د اړتیا وړ مهارتونو زدهکړه یې د ځوان نسل له مهمو اړتیاوو څخه وبلله.
نوموړي د عصري مهارتونو، په ځانګړي ډول فریلانسینګ (انلاین کاروبار)، کمپیوټري زدهکړو، انګلیسي ژبې، ګرافیک، مسلکي او حرفوي مهارتونو اهمیت ته په اشارې سره، له اکتید مؤسسې سره د ځوانانو چارو ریاست پر هر اړخیزې همکارۍ ټینګار وکړ.
د دغه هوکړهلیک پر بنسټ، اکتید مؤسسه به خپل فعالیتونه په فاریاب، جوزجان، بلخ او سمنګان ولایتونو کې پلي کړي. د دې پروګرام په چوکاټ کې به ۱۶ ښوونیز مرکزونه فعال شي، چې د یادو مرکزونو ترمیم او د مدیرانو او استادانو ګمارل به هم پکې شامل وي.
همدارنګه ټاکل شوې چې ۴۸۰۰ ځوانانو ته د کمپیوټر، انګلیسي ژبې، ګرافیک او فریلانسینګ په برخو کې شپږ میاشتني ښوونیز ټولګي هم جوړ شي او ګډونوالو ته به کتابونه او قرطاسیه هم په وړیا توګه ووېشل شي.
د ورزشي فعالیتونو په برخه کې به ۱۶ ورزشي ټیمونه جوړ او اړین وسایل به ورته برابر شي. همدارنګه د ځوانانو د ظرفیت لوړونې په موخه به ۱۶ ډلې، چې هره ډله به ۴۰ تنه غړي ولري، جوړې شي، ترڅو غړي یې د رهبري، لیکوالي او ویاندویي په برخو کې زدهکړې ترلاسه کړي.
په دې ناسته کې د عصري ښوونیزو پروګرامونو ترڅنګ پر دیني او اصلاحي زدهکړو هم ټینګار وشو او هوکړه وشوه، چې په ښوونیزو مرکزونو کې به ځوانانو ته د اصلاح په موخه سیمینارونه وړاندې شي او د دیني برخې لپاره به یو استاد هم وګمارل شي.
همدارنګه د کندز ولایت د ځوانانو د پیاوړتیا مرکز د ملاتړ او تمویل وړاندیز هم مطرح شو. د ځوانانو چارو رئیس وړاندیز وکړ، چې ورته پروګرامونه دې د هېواد نورو ولایتونو ته هم پراخ شي،ترڅو د لا ډېرو ځوانانو لپاره د زدهکړو او ظرفیت لوړونې زمینه برابره شي.
۱۴۴۸/۲/۲۸ هـ ق
