پکتیا کې خبریالانو ته د عقیدوي، فکري او مسلکي ظرفیت لوړونې یو ورځنی سیمینار وړاندې شو

د اطلاعاتو او فرهنګ وزارت د خپرونو چارو معینیت له لوري د پکتیا ولایت ګڼ شمېر خبریالانو، شاعرانو، فرهنګپالانو او قلموالو مبارزینو ته د عقیدوي، فکري او مسلکي ظرفیت لوړونې یو ورځنی روزنیز سیمینار وړاندې شو.
د غونډې په پیل کې د پکتیا د اطلاعاتو او فرهنګ رئیس مولوي فیض الله جوهري ګډونوالو ته د ښه راغلاست ترڅنګ وویل: هر خبریال او قلموال چې خپل قلم ته ژمن پاتې نه شي، د ولس په منځ کې خپل باور او محبوبیت له لاسه ورکوي، ټول باید د حق ویلو او حق لیکلو ته ژمن پاتې شو، ترڅو راتلونکو نسلونو ته یو روښانه او مستند تاریخ په میراث پرېږدو.
دغه راز د خپرونو چارو معین ښاغلي مهاجر فراهي وویل: د رسنیو مسؤلین، خبریالان، لیکوالان، قلموال مبارزین او قومي مخور مسؤلیت لري، چې د هېواد مثبت بدلونونه، د عالیقدر امیرالمؤمنین(حفظه الله) فرامین او د اسلامي نظام لاسته راوړنې په اغېزمنه توګه خلکو ته ورسوي.
ښاغلي فراهي زیاته کړه، چې رسنۍ باید د اطلاع رسونې ترڅنګ حقایق هم ولس ته وړاندې کړي، د ځوان نسل د سالم ذهنیت په جوړولو کې ونډه واخلي او د عامه افکارو د سمون او ساتنې لپاره کار وکړي.
ورته مهال پر ټولیزو رسنیو د څار رئیس مولوي صفي الله رائد، د یاد وزارت د عامه اړیکو رئیس او ویاند قاري خبیب غفران او د خپرونو چارو معینیت سلاکار مولوي عبدالحق حماد د مسلمان اساسي مسؤلیت د اسلامي نظام اقامه او د اسلامي امت د یووالي ساتنه وبلله او ویې ویل: خبریالان یوازې د اطلاع رسونکې نه دي، بلکې د اسلامي هویت، ملي فرهنګ او تاریخي ارزښتونو د ساتنې مهم مسؤلیت لري، سره له دې چې مسلمانانو ته پراخ امکانات ورکړل شوي، خو د ایمان او عقیدې کمزوري، خپلمنځي اختلافات، له عصري ټکنالوژۍ څخه لرېوالی، د شرعي نصوصو ناسم تعبیر او رسنیز ډګر ته کمه پاملرنه د اسلامي امت د وروسته پاتې کېدو مهم عوامل دي، د نوموړو په وینا؛ رسنۍ باید د خپلو امکاناتو له لارې د اسلامي نظام د پیاوړتیا او ثبات لپاره خپل مسؤلیتونه په ښه توګه ترسره کړي.
د غونډې په لړ کې د پکتیا مرستیال والي مولوي محمد انور دین‌ پرور وویل: خبریالان باید داسې خپرونې جوړې کړي، چې جامع، کره او پر حقایقو ولاړ وي، دوی له خبریالانو څخه وغوښتل چې د ناسمو تبلیغاتو، افواهاتو او ناسم اطلاع رسونې پر وړاندې د مستندو معلوماتو له لارې ولس ته حقایق روښانه کړي.
د پکتیا د خبریالانو د خوندیتوب کمېټې مسؤل ساحل منګل د خبریالانو او رسنیو ستونزې له مسؤلینو سره هم شریکې کړې.
د یادونې وړ ده، چې په دغه سیمینار کې د پکتیا پوهنتون د ژورنالېزم پوهنځي استاد محمد ایاز ذکي د خبریالانو مسلکي ظرفیت لوړونې په اړه هم معلومات وړاندې کړل.

۱۴۴۸/۲/۲۱ هـ ق