پکتیا کې د مقالو تقریري سیالي ترسره او پایلې یې اعلان شوې
د پکتیا ولایت د اطلاعاتو او کلتور ریاست اړوند ځوانانو چارو آمریت له لوري د الکوثر فکري او فرهنګي ادارې په همکارۍ په پنځو موضوعاتو کې د مقالې وړاندې کولو سیالۍ ترسره او پایلې یې اعلان شوې.
په دغه سیالۍ کې په ټاکل شویو موضوعاتو (فکري جګړه او تأثیرات یې، په اسلام کې د دیني او عصري علومو ځای، د ټولنې په اصلاح او اسلامي نظام په استحکام کې د مصلح ځوانانو رول، په اسلام کې د ناسمو رواجونو رد او په افغاني ټولنه یې تاثیرات، په اسلام کې د انساني قاچاق منع او په افغاني ټولنه یې تاثیرات) ۳۵ تنو لیکوالانو لیکنې کړې وې.
د اطلاعاتو او کلتور رئیس مولوي ثواب جان اسلامیار وویل: له دغې سیالۍ څخه موخه لیکوالۍ او مطالعې ته د ځوانانو هڅونه، په ټولنه کې د ناوړه دودونو مخنیوی او د عالیقدر امیرالمؤمنین حفظه اللّٰه ١٧ مې ګڼې فرمان په برخه کې ځوان نسل ته عامه پوهای ورکول وو.
مولوي اسلامیار د سیالۍ له ګډونوالو وغوښتل، چې د اسلامي نظام پایښت او نوي نسل سالمې روزنې په موخه دې په خپلو ژبو لیکنې وکړي او له نورو ژبو څخه دې هم اغیزمنې لیکنې او کتابونه وژباړي.
همدا راز د سیالۍ ګډونوالو د یادې سیالۍ له جوړولو خوښي څرګنده کړه او زیاته یې کړه؛ چې دغه سیالۍ د لیکنې اصلاح او تشویق په موخه ډیره ګټوره وه، ځوانان په دې وپوهېدل چې څه ډول لیکنه وکړي او په لیکنه کې شته نیمګړتیاوې وپیژني.
د یادونې وړ ده، چې د یادې سیالۍ ۲۵ تنه مخکښ ګډونوال په بېلابیلو ډالیو ورکولو سره وستایل شو.
۱۴۴۷/۳/۱۷ هـ ق
