د اطلاعاتو او کلتور ریاست اړوند ښوونیز مرکز څخه سلګونه تنه ځوانان فارغ شول
د جوزجان اطلاعاتو او کلتور ریاست اړوند ښوونیز مرکز له شپږ میاشتني پروګرام څخه ۴۰۰ تنه ځوانان فارغ شول، چې د فراغت غونډه کې یې د اطلاعاتو او کلتور ریاست مسؤلینو ترڅنګ د جوزجان ولایت والي مولوي عبدالله سرحدي او د ځایي امارتي ادارو مسؤلینو ګډون کړی و.
د اطلاعاتو او کلتور رئیس د دې مرکز لاسته راوړنو ته په اشارې سره وویل: په تېرو څلورو کلونو کې څه باندې ۴۳۰۰ ځوانان له بېلابېلو تعلیمي څانګو څخه فارغ شوي او دا مهال د ټولنې په بېلابېلو برخو کې پر خدمت بوخت دي.
دغه راز د جوزجان والي مولوي عبدالله سرحدي زده کړې د پرمختګ اساسي محور وباله او له ځوانانو څخه یې وغوښتل، چې د لا زیاتو هڅو او مهارتونو د زده کړې له لارې ټولنې ته پرمختګ ورکړي.
همدارنګه د ځایي امارتي ادارو مسؤلینو هم په خپلو خبرو کې زده کړې او د مهارتونو ترلاسه کول د ځوان نسل اساسي اړتیا وبلله او ځوانان یې له دې ډول پروګرامونو څخه د اعظمي ګټې اخیستنې ته وهڅول.
۱۴۴۷/۱۰/۲۶ هـ ق
