د هنر او فرهنګ معین د کابل له ماشین خانې او له جوړ شوي ماډل څخه یې لیدنه وکړه
د اطلاعاتو او فرهنګ وزارت د فرهنګ او هنر معین مولوي عتیق الله عزیزي د یو پلاوي په مشرۍ د کابل د ماشین خانې تاریخي سیمې کې د شویو نوښتونو او د دغې سیمې له جوړ شوي ماډل څخه لیدنه وکړه.
ښاغلي عزیزي د یادې لیدنې پر مهال وویل: د هېواد تاریخي شتمنۍ یوازې د تېر وخت یادونه نه دي، بلکې د راتلونکو نسلونو لپاره د ملي هویت ساتنې ژوندۍ بېلګې دي. نوموړي زیاته کړه، چې د ماشینخانې په څېر ځایونه باید په داسې ډول مدیریت شي چې هم یې تاریخي ارزښت وساتل شي او هم ترې ګټه واخیستل شي.
کابل تاریخي ماشین خانې کې د آغا خان فرهنګي بنسټ له لوري د ماشینخانې اړوند زاړه وسایلو، تخنیکي تجهیزاتو او تاریخي اثارو نندارتونونه هم جوړ شوي دي، چې دغه نندارتونونه د افغانستان صنعتي تاریخ په ښه توګه بیانوي د دغو نندارتونونو ترڅنګ د نظامي وسلو یو ځانګړی موزیم هم جوړ شوی، چې پکې د پوځي وسایلو تاریخي بدلونونه او پرمختګونه نندارې ته وړاندې شوي دي.
د آغاخان فرهنګي بنسټ استازو هم د لیدنې پر مهال د فرهنګي میراثونو د ساتنې پر دوامداره همکاریو ټینګار وکړ.
دهنر او فرهنګ معین په ماشین خانه کې له هغه جوړ شوي فرهنګي ماډل څخه هم لیدنه وکړه، چې په دې ورستیو کې د هېواد د تکړه ځوانانو د آغا فرهنګي بنسټ په مرسته جوړ کړی دی.
په یا ماډل کې په خورا مهارت او ذهانت سره د کابل ښار فرهنګي، صنعتی، رهايشي او مهم تاسیسات طرحه شوي دي.
ښاغلي عزیزي دغه ماډل یو تاریخي نوښت وباله او د کابل ښار د فرهنګي هویت او ارزښتونو د ساتنې په برخه کې یې مهم اثر او لارښود یاد کړ.
۱۴۴۷/۱۱/۱۳ هـ ق
