بدخشان کې د بیهقي کتابپلورنځي غرفه پرانیستل شوه
د اطلاعاتو او فرهنګ وزارت اړوند د قرآن کریم لیکلو او بیهقي کتابونو د خپرولو ریاست له لوري د مطالعې فرهنګ د ودې او د خلکو دیني او فرهنګي سرچینو ته د لاسرسي په موخه، بدخشان ولایت کې د یو شمېر امارتي ادارو مسؤلینو او فرهنګي شخصیتونو په شتون کې د بیهقي کتابپلورنځي غرفه پرانیستل شوه.
د بدخشان د اطلاعاتو او فرهنګ ریاست مسوولینو وویل: د یادې غرفې پرانیستل په ټولنه کې د مطالعې فرهنګ د پیاوړتیا لپاره یو اغیزمن ګام دی، مسؤلینو د ولسونو فکري او فرهنګي ودې په برخه کې د کتاب پر ارزښت ټینګار وکړ.
دغه راز مسؤلینو دا اقدام د خلکو فرهنګي اړتیاوو ته د پاملرنې څرګندونه وبلله او د اړوندو ادارو له ترسره کړیو هڅو څخه یې مننه وکړه، مسؤلینو زیاته کړه، چې د دې مرکز د لا بډاینې لپاره به هڅې روانې وساتي.
ورته مهال د قرآن کریم لیکلو او بیهقي کتابونو د خپرولو ریاست اړوند د خصوصي خپرندویانو او کتابپلورونکو مسوول وویل: د دې غرفې د بډاینې په موخه ۵۸ بېلابېل عنوانه کتابونه، چې پکې دیني او عصري علومو آثار شامل وو، یادې غرفې ته ډالۍ شول.
د بدخشان ولایت یو شمېر فرهنګي شخصیتونو د دې اقدام هرکلی وکړ او د داسې مرکزونو جوړول یې د کتاب لوستنې فرهنګ د پیاوړتیا او د ټولنیزې پوهاوي د زیاتولو په برخه کې مهم وبلل او دا یې د راتلونکو نسلونو د ښه فرهنګي راتلونکي لپاره یو هیلهبښونکی ګام وباله.
۱۴۴۷/۱۱/۱۹ هـ ق
