غزني کې (د رسنیزې پوهې او فکري اصلاح) په نوم یو ورځنی سیمینار وړاندې شو
د غزني ولایت د اطلاعاتو او فرهنګ ریاست له لوري د دغه ولایت د پوهنې ریاست په همغږۍ (د رسنیزې پوهې او فکري اصلاح) په نوم ګڼ شمېر استادانو، فرهنګیانو، زده کړیالانو، زدهکوونکو او ځوانانو ته یو ورځنی سیمینار وړاندې شو.
د اطلاعاتو او فرهنګ رئیس ملا حمیدالله نثار د خلکو د پوهاوي په برخه کې د رسنیو پر مهم رول ټینګار وکړ او له ځوانانو څخه یې وغوښتل چې د ناسمو خبرونو، اوازو او د مغرضو رسنیو د تبلیغاتو تر اغېزې لاندې رانشي.
نوموړي د اسلامي امارت د لاسته راوړنو، د رسنیزې پوهې د اهمیت او د ناسمو خبرونو د پېژندلو د لارو چارو په اړه معلومات وړاندې کړل او ځوانان یې د لوړو زدهکړو ترلاسه کولو ته وهڅول.
د سیمینار په لړ کې ویناوالو د ټولنې د فکري ثبات او فکري جګړې د پایلو په اړه خبرې وکړې او فکري جګړه یې جدي ګواښ یاده کړه، د سیمینار په پای کې ګډونوالو د دا ډول سیمینارونو جوړول د ځوانانو د فکري ودې په برخه کې اغیزمن وبلله او د دغو پروګرامونو د دوام غوښتنه یې وکړ.
۱۴۴۸/۳/۲۰ هـ ق
