د هرات د اطلاعاتو او فرهنګ رئیس د سیاحتي، زیارتي او روغتیايي شرکتونو د اتحادیې له مسؤلینو سره وکتل
د هرات د اطلاعاتو او فرهنګ رئیس مولوي عتیقالله عزیزي، د دې ولایت د سیاحتي، زیارتي او روغتیايي شرکتونو د اتحادیې له مسؤلینو او د یو شمېر سیاحتي، زیارتي او روغتیایي شرکتونو له مسؤلینو سره په کتنه کې د دوی د فعالیتونو، ستونزو او اړتیاوو په اړه خبرې وکړې.
ښاغلي عزیزي وویل: سیاحتي، زیارتي او روغتیایي شرکتونه د هېواد د سیاحتي ظرفیتونو په معرفي کولو، د هېوادوالو د سفرونو په اسانتیا او مسافرو ته د خدمتونو په وړاندې کولو کې مهم رول لري. نوموړي زیاته کړه، چې د هرات د اطلاعاتو او فرهنګ ریاست د قوانینو او مقرراتو په چوکاټ کې له یادو شرکتونو سره همکارۍ ته چمتو دی.
د ښاغلي عزیزي په وینا؛ د اړوند امارتي ادارو او سیاحتي، زیارتي او روغتیايي شرکتونو ترمنځ همکاري او همغږي کولای شي، چې خلکو ته د لا غوره خدمتونو د وړاندې کولو او د هرات د تاریخي او فرهنګي جاذبو د لا ښه معرفي کولو زمینه برابره کړي.
ورته مهال د هرات د سیاحتي شرکتونو د اتحادیې رئیس وویل: سیاحتي شرکتونه د مسافرو د لېږد او د سفر اړوندو د خدمتونو د اسانتیاوو برابرولو په برخو کې فعالیت کوي او د اړوندو ادارو همکاري کولای شي، چې د دغو شرکتونو د فعالیتونو په ښه والي کې اغېزمنه تمامه شي.
نوموړي د هرات د اطلاعاتو او فرهنګ له رئیس سره د اتحادیې او د یادو شرکتونو ستونزې شریکې کړې او د دغو ستونزو د حل په برخه کې یې د لا زیاتو همکاریو او همغږۍ غوښتنه وکړه.
۱۴۴۸/۳/۲۲ هـ ق
