ګرمسېر کې شانداره مشاعره تر سره شوه

د هلمند ولایت د اطلاعاتو او فرهنګ ریاست اړوند د ګرمسېر ولسوالۍ د اطلاعاتو او فرهنګ مدیریت له لوري د ګڼ شمېر ولسي وګړو په شتون کې شانداره میاشتنۍ مشاعره تر سره شوه.
په مشاعره کې د ګرمسېر ولسوالۍ د ادبي بهیر په استازیتوب مولوي محمد ولي محبت ګډونوالو ته د ښه راغلاست ترڅنګ د شعر او شاعرۍ پر ارزښت خبري وکړې او ويې ويل: شاعري يوه سپېڅلې دنده ده، چې د تېر جهاد په دورې کې د ولسونو د ویښتیا په برخه کې یې مهم رول درلود.
نوموړي له شاعرانو غوښتنه وکړه، چې د هيواد د ابادۍ، نوښتونو، پرمختګونو، اسلام او نظام په ګټه شعرونه جوړ کړي، ترڅو ټولنې او نړۍ ته يو مثبت پيغام ورسيږي او د داسې لیکنو او شعرونو څخه ډډه وکړي، چې د اسلام او ټولنې په زيان وي.
د مشاعرې په لړ کې ګڼ شمېر شاعرانو، ترنم کوونکو او نعت ويونکو خپل ترتیب کړي شعرونه، نظمونه او ترانې ګډونوالو ته واورولې، چې د ګډونوالو له لوري یې تود هرکلی وشو.

۱۴۴۸/۳/۲۹ هـ ق