زابل کې ادبي مشاعره ترسره شوه
زابل کې د زمري ۲۴مې او ۲۸مې د (خپلواکۍ) ورځو په مناسبت د اطلاعاتو او فرهنګ ریاست په انګړ کې ادبي مشاعره ترسره شوه.
د اطلاعاتو او فرهنګ ریاست د فرهنګ او ګرځندوی آمر وايي؛ چې یاده مشاعره د اطلاعاتو او فرهنګ ریاست په همغږۍ او همکارۍ د «البدر ادبي بهیر» له لوري د زمري ۲۴مې او ۲۸مې د تاریخي ورځو په مناسبت جوړه شوې وه.
نوموړي زیاته کړه، چې په دې ادبي ناسته کې لسګونو شاعرانو، لیکوالانو او د ادب مینهوالو ګډون کړی و او موخه یې د هېواد د خپلواکۍ د ارزښتونو یادونه، د ادب او فرهنګ پیاوړتیا او د ځوان نسل ترمنځ د ملي احساساتو لا پیاوړي کول وو.
ورته مهال یو شمېر شاعرانو او لیکوالانو د ورته ادبي ناستو جوړول د ملي یووالي، فرهنګي همغږۍ او راتلونکو نسلونو ته د هېواد د تاریخي ارزښتونو د لېږد لپاره مهم وبلل.
په مشاعره کې ګڼ شمېر شاعرانو او ترانهویونکو د هېواد د خپلواکۍ، ملي یووالي او وطنپالنې په اړه خپل ترتیب کړي شعرونه ګډونوالو ته وړاندې کړل، چې د ګډونوالو له لوري یې تود هرکلی وشو.
۱۴۴۸/۳/۸ هـ ق