خوست کې د موزیمونو لپاره ځمکه تثبیت شوه

د خوست ولایت د اطلاعاتو او کلتور ریاست په نوښت او د اطلاعاتو او کلتور وزارت د جهادي آثارو د ساتنې لوی ریاست په چوکاټ کې، د خوست د عمومي موزیم او د جهادي آثارو د ساتنې موزیم لپاره د بیرغ پر تپه د ۱۵ جریبه ځمکې لېدنه او تثبیت ترسره شو.
د اطلاعاتو او فرهنګ ریاست مسؤلین وایي، چې له یادې ځمکې څخه ۱۰ جریبه د خوست عمومي موزیم او ۵ جریبه د جهادي آثارو د ساتنې موزیم لپاره ځانګړې شوې ده. د خوست عمومي موزیم چې اوس مهال د اطلاعاتو او فرهنګ ریاست په ودانۍ کې ځای لري، د نوې او معیاري ودانۍ د جوړېدو سره به د تاریخي او فرهنګي آثارو د ساتنې لپاره مناسب امکانات برابر شي. همدارنګه د جهادي آثارو د ساتنې موزیم به د خوست ولایت د جهاد دورې اړوند آثار په معیاري ډول خوندي او نندارې ته وړاندې کړي.
دغه ځمکه د اطلاعاتو او فرهنګ ریاست، کرنې او مالدارۍ ریاست او ښاروالۍ ریاست پلاوو له لوري تثبیت شوه، چې د یادو ریاستونو پلاوو د ځمکې حدود، موقعیت او د موزیمونو د جوړېدو لپاره د مناسب، تخنیکي او عملي برخې وارزولې او راتلونکو پړاوونو کې به د ځمکې کروکي چمتو شي، چې وروسته به د دواړو موزیمونو د جوړېدو عملي چارې هم پیل شي.
د خوست د اطلاعاتو او فرهنګ ریاست مسؤلین وایي، د دغو موزیمونو جوړېدل به د خوست د تاریخي، فرهنګي او جهادي آثارو د ساتنې، تنظیم او معرفي کولو لپاره مناسب فرصت برابر کړي او د ولایت د فرهنګي شتمنیو د خوندي کولو په برخه کې به مهم رول ولوبوي.

۱۴۴۷/۱۲/۲۱ هـ ق