د اطلاعاتو او فرهنګ وزیر صاحب د یوناما دفتر د بشري حقونو مسوولې سره ولیدل
د اطلاعاتو او فرهنګ وزیر ښاغلي شیخ شیراحمد حقاني د یوناما دفتر د بشري حقونو مسوولې آغلې فیانو فریزر او ورسره مل پلاوي سره په خپل کاري دفتر کې ولیدل.
په دې ناسته کې دواړو لورو په افغانستان کې د رسنیو وضعیت، د بشر د حقونو او تاریخي آبداتو د ساتنې پر څرنګوالي خبرې وکړې.
د یوناما دفتر د بشري حقونو مسوولې آغلې فیانو فریزر وویل: د رسنیو په برخه کې د اطلاعاتو او فرهنګ وزارت فعالیتونه ښه شوي دي، د خبریالانو ستونزو ته پر وخت رسېدنه شوې او د اطلاع رسونې په برخه کې اسانتیاوې رامنځته شوې دي آغلې فریزر ټینګار وکړ، چې د رسنیو ملاتړ د دوامداره اووسي.
همدارنګه آغلې فریزر د بشر د حقونو ساتنې په برخه کې د امیرالمؤمنین(حفظه الله) له لوري د فرامینو صادرول ښه اقدام وبلله او ویې ویل: د فرامینو صادرول د بشر د حقونو د ساتنې په برخه کې یو ښه او مثبت اقدام دی، نوموړې زیاته کړه، چې د معتادینو پر روغتون د وروستی برید په اړه څیړنې روانې دي.
د ناستې په لړ کې د اطلاعاتو او فرهنګ وزیر صاحب وویل: د اطلاعاتو او فرهنګ وزارت د قانون په رڼا کې د رسنیو پوره ملاتړی دی، د اصولو په اساس له رسنیو سره هر وخت همغږۍ دی او د رسنیو د اقتصادي وضعیت د لا ښه کېدو په موخه خپلې پوره هڅې کوي، ترڅو د رسنیو پر وړاندې شته ستونزې حل شي.
ښاغلي شيخ صاحب زیاته کړه، چې د انساني ټولنې لپاره د مشرتابه ټول فرامین د خیر او کامیابي په موخه صادر کیږي او په دغو فرامینو کې د ښځو حقونه په پوره توګه ساتل شوي دي چې ښځو ته یې د دوی کامل اسلامي حقونه ورکړي دي.
۱۴۴۷/۱۱/۲۳ هـ ق
