د لوحو او اعلاناتي تابلوګانو د اصلاح کمېسیون غړو د صنعت او سوداګرۍ وزارت مالي او اداري معین سره وکتل
د لوحو او اعلاناتي تابلوګانو د اصلاح کمېسیون غړو، د خپرونو چارو معينيت مقام د لارښوونې او د دې کمېسیون د تېرې غونډې د پرېکړې پر اساس، د صنعت او سوداګرۍ وزارت مالي او اداري معينيت له مسئولينو سره وکتل.
په دې غونډه کې د مرکز او ولايتونو د کسبهکارانو او هټيوالو د هغو غوښتنې په اړه هر اړخيز بحث وشو، چې غواړي هغه جوازونه، چې په سرليکونو کې يې بهرنۍ اصطلاحات او کلمې کارول شوي او اصلاح ته اړتيا لري، په وړيا ډول نوي شي. همدارنګه، د هېواد ملي ژبو پښتو او دري ژبو ته د لومړيتوب ورکولو پر موضوع ټينګار وشو، ترڅو د مرکز او ولايتونو د جوازونو غوښتونکو ته د نويو جوازونو د صادرولو پر مهال له همدغو ژبو څخه استفاده وشي.
د کمېسیون غړو په دې ليدنه کې د صنعت او سوداګرۍ وزارت مالي او اداري معين الحاج مولوي شهابالدين ثاقب ته د لوحو او اعلاناتي تابلوګانو د اصلاح د بهير په اړه اړين معلومات وړاندې کړل.
دغه راز مولوي شهابالدين ثاقب د دې طرحو څخه د هرکلي کولو ترڅنګ د هېواد د ملي ژبو او فرهنګ د پياوړتيا او ملاتړ په برخه کې د صنعت او سوداګرۍ وزارت د هر اړخيزې همکارۍ ډاډ څرګند کړ.
د يادونې وړ ده، چې د لوحو او اعلاناتي تابلوګانو د اصلاح کمېسیون هڅه کوي، چې د اړوندو ادارو په همغږۍ د سوداګريزو نومونو او لوحو په نومولو کې د هېواد د ملي ژبو د لا پراخې کارونې زمينه برابره کړي او د بهرنيو کلمو د بېځایه کارونې مخه ونيسي.
۱۴۴۸/۲/۶ هـ ق
