د چنارتو ولسوالۍ له ولسونو سره غونډه وشوه

د روزګان اطلاعاتو او کلتور ریاست له لوري د همکارو ادارو په همکارۍ د دې ولایت په چنارتو ولسوالۍ کې د ولسونو د یووالي لا پیاوړتیا، د عامه افکارو جوړونې او د اسلامي نظام د ملاتړ په موخه غونډه وشوه.
د اطلاعاتو او کلتور رئیس مولوي رحمت الله ریحان د غونډې جوړولو پر ارزښت خبرې وکړې او ویې ویل: دا ډول پروګرامونه د ټولنې د فکري ویښتیا، د ځوانانو د سم لوري ټاکلو او د ولسونو ترمنځ د باور فضا د پیاوړتیا لپاره ډېر مهم دي، د اطلاعاتو او کلتور ریاست به هڅې وکړي، چې ورته پروګرامونه په نورو ولسوالیو کې هم جوړ کړي، تر څو د ټولنې فکري او فرهنګي بنسټونه لا قوي شي.
په غونډه کې دیني علماوو کرامو او ویناوالو د اسلامي ورورولۍ او یووالي پر اهمیت ټینګار وکړ او ویې وویل: د مسلمانانو قوت په یووالي کې دی او که ولسونه سره یو موټی شي، نو کولای شي چې هر ډول ستونزه په اسانه حل کړي. 
دغه راز ویناوالو د ځوان نسل د سالم فکر روزلو او دیني او عصري علومو زده کړو د اهمیت په اړه خبرې وکړې او زیاته یې کړه؛ چې که د ځوانانو فکر سم جوړ شي، د ټولنې د اصلاح، پرمختګ او ثبات لپاره اغېزمن رول لوبولی شي. 
همدارنګه په غونډه کې قومي مشرانو او د سیمې مخورو د اسلامي امارت څخه خپل بشپړ ملاتړ اعلان کړ او ویې ویل: دا ډول غونډې د ولسونو ترمنځ د اړیکو د پیاوړتیا، د باور زیاتوالي او د نظام د ثبات لپاره ډېرې ګټورې دي.

۱۴۴۷/۱۰/۲۰ هـ ق