سلګونو تنو زده کوونکو ته یو ورځنی روزنیز سیمینار وړاندې شو

د اطلاعاتو او فرهنګ وزارت اړوند د عامه کتابتونونو ریاست له لوري په استقلال لیسه کې شاوخوا ۴۰۰ تنو زده کوونکو ته د مطالعې دود د پیاوړتیا، د زده کوونکو هڅولو او د اغیزمنې مطالعې لارو چارو ښودلو په موخه روزنیز سیمینار وړاندې شو.
په دغه سیمینار کې د عامه کتابتونونو رئیس دوکتور رفیع الله صمیم د اغیزمنې مطالعې کولو په اړه معلومات وړاندې کړل او ویې ویل: دوی په ټولنه کې د مطالعې دود پراختیا او پیاوړتیا ته هڅې کوي، په همدې موخه د عامه کتابتونونو ریاست تالارونه د شپې له لوري تر لسو بجو پورې د ټولو پر مخ پرانیستي.
ښاغلي صمیم له زده کوونکو څخه وغوښتل، چې خپل او د ټولنې ښې راتلونکې جوړولو په موخه د وخت له بې ځایه تیرولو څخه مخنیوی وکړي او د ورځنیو چارو ترڅنګ د بېلابېلو مضامینو مطالعې کولو ته هم وخت ځانګړی کړي.
دغه راز د استقلال لیسې آمر هم د مطالعې په اړه خبرې وکړې او له زده کوونکو یې وغوښتل، چې د علمي ظرفیت لوړولو په موخه عامه کتابتونونونو ته مراجعه وکړي.
دا په داسې حال کې ده، چې ترې دې وړاندې هم د عامه کتابتونونو ریاست له لوري د مرکز ترڅنګ بېلابېلو ولایتونو کې د مطالعې دود پراختیا او پیاوړتیا په موخه سلګونو تنو ځوانانو ته روزنیز سیمینارونه وړاندې شوي دي.

۱۴۴۸/۱/۱۸ هـ ق