پنجشېر کې د مطالعې او کتاب لوستنې فرهنګ د ودې یو ورځنی روزنیز سیمینار وړاندې شو

د اطلاعاتو او فرهنګ وزارت د عامه کتابتونونو ریاست له لوري د پنجشېر د اطلاعاتو او فرهنګ ریاست په همکارۍ د مطالعې او کتاب لوستنې فرهنګ د عامولو په موخه ګڼ شمېر ځوانانو ته یو ورځنی روزنیز سیمینار وړاندې شو.
د پنجشېر د اطلاعاتو او فرهنګ ریاست مسؤلینو د دې ډول روزنیزو پروګرامونو پر اهمیت خبرې وکړې او ویې ویل: د اطلاعاتو او فرهنګ ریاست تل د مطالعې او کتاب لوستنې فرهنګ د عامولو لپاره هڅې کړې دي، د بېلابېلو فرهنګي او روزنیزو پروګرامونو او غونډو له لارې یې د ځوانانو او د ټولنې نورو قشرونو ترمنځ د مطالعې فرهنګ د پراختیا او پیاوړتیا لپاره اغېزمن کار کړی دی.
د عامه کتابتونونو رئیس دوکتور رفیع‌الله صمیم د کتاب او مطالعې پر ارزښت ټینګار وکړ او زیاته یې کړه؛ د عامه کتابتونونو ریاست د کتابتونونو د تجهیز، پراختیا او ملاتړ په برخه کې همکارۍ ته چمتو دی، د پنجشېر د عامه کتابتون ستونزو او وړاندیزونو ته به پر وخت رسېدنه وشي.
نوموړي ټینګار وکړ، چې د عامه کتابتونونو ریاست د دې ډول سیمینارونو په جوړولو سره هڅه کوي، چې د افغانستان په ټولو ولایتونو کې د مطالعې او کتاب لوستنې فرهنګ ته وده ورکړي.
د یادونې وړ ده، چې دغه سیمینار د مطالعې او کتاب لوستنې فرهنګ د عامولو او ځوانان د علم ترلاسه کولو لپاره د هڅولو او په پنجشېر ولایت کې د علمي او فرهنګي پوهاوي د کچې د لوړولو په موخه جوړ شوی و.

۱۴۴۸/۱/۲ هـ ق