د امارت او رسنيو د ګډې کميټې ناسته ترسره شوه
کاپيسا ولايت کې د امارت او رسنيو د ګډې کميټې ناسته د اطلاعاتو او کلتور د رئيس مولوي کريم الله وثيق په مشرۍ، د يو شمېر رسنيو د استازو، خبريالانو او د محلي ادارو د مطبوعاتي مسوولينو په ګډون ترسره شوه.
مولوي کريم الله وثيق وويل: رسنيو د انسانانو د ټولنيز ژوند پر بهير خورا ارزښتمن اغېز کړی دی، نوموړي رسنۍ د حق او باطل پر وړاندې د مبارزې او د دښمن د فکري او تبليغاتي جګړې پر وړاندې د مقابلې کولو تر ټولو غوره وسيله وبلله.
ښاغلي وثیق د عامه رسنيو او خبريالانو رول د افرادو په روزنه او د ټولنې په بيدارۍ کې اغېزناک وباله او ويې ويل: رسنۍ دي چې خلکو ته ذهنيت ورکوي او د نړۍ له تحولاتو يې خبروي.
په همدې مهال، د رسنيو يو شمېر استازو، خبريالانو او د ادارو مطبوعاتي مسوولينو خپلې هڅې او نشراتي فعاليتونه تشريح کړل او ورسره يې خپلې ستونزې او وړانديزونه هم مطرح کړل، چې مسؤولينو يې د حل ډاډ ورکړ.
۱۴۴۷/۵/۲۷ ھ ق
