په لاس لیکل شوې د قرآنکریم ارزښتمنه نسخه د اطلاعاتو او فرهنګ ریاست ته وسپارل شوه
د پنجشېر د اطلاعاتو او فرهنګ ریاست مسؤلین وایي؛ چې د قرآن کریم یوه ارزښتمنه په لاس لیکل شوې نسخه، چې نږدې ۸۰۰ کاله تاریخي مخینه لري، د دې ولایت آبشار ولسوالۍ کې موندل شوې او یاد ریاست ته سپارل شوې ده.
د مسؤلینو په وینا، دا لرغونې او بېسارې نسخه د آبشار ولسوالۍ د یوه اوسېدونکي له خوا د اطلاعاتو او فرهنګ ریاست ته سپارل شوې ده.
د مسؤلینو په خبره، لومړني معلومات ښیي چې دغه سپېڅلی مصحف له تاریخي، فرهنګي او دیني پلوه ډېر لوړ ارزښت لري او لرغونتوب یې شاوخوا اته پېړۍ اټکل شوی دی.
مسؤلینو د دغه هېوادپال وګړي له صادقانه همکارۍ او د مسؤلیت له احساس څخه مننه وکړه او ټینګار یې وکړ، چې د تاریخي آثارو او فرهنګي میراثونو ساتنه یوه ملي دنده او د ټولو هېوادوالو ګډ مسؤلیت دی.
د یادونې وړ ده، چې د قرآن کریم دا ارزښتمنه نسخه به له تخصصي څېړنو او علمي ثبت او مستندسازۍ وروسته، د فرهنګي میراثونو د ساتنې له اصولو او معیارونو سره سم تر ځانګړې پاملرنې لاندې وساتل شي، ترڅو د راتلونکو نسلونو لپاره خوندي پاتې شي.
۱۴۴۷/۱۲/۲۰هـ ق
