د لرغون پېژندنې په ریاست کې د لرغون پېژندونکو کمېټې غونډه ترسره شوه
د اطلاعاتو او فرهنګ وزارت اړوند د لرغون پېژندنې رئیس سید ذبیحالله سادات په مشرۍ د لرغون پېژندونکو کمېټې غونډه، د کمېټې د غړو په حضور کې چې د کابل پوهنتون، د افغانستان د علومو اکاډمۍ، د تاریخي آبداتو د ساتنې او بیارغونې ریاست او د لرغون پېژندنې ریاست استازي پکې شامل دي، ترسره شوه.
په دې غونډه کې د لرغونو ساحو د وضعیت، تاریخي آبداتو او د هېواد له فرهنګي میراثونو سره د اړوندو نورو علمي او مسلکي موضوعاتو په اړه بحث او هر اړخیزه ارزونه وشوه او له تخصصي بحثونو وروسته، د ۱۳ موضوعاتو په اړه لازمې پرېکړې وشوې.
همدارنګه، په دې غونډه کې د لوګر ولایت د مسعینک او د غور ولایت د منار جام له لرغونو ساحو څخه د معماري موادو، عضوي موادو او کاربني نمونو بېلګې، چې په بهر کې د تخصصي لابراتواري ازموینو او تحلیلونو لپاره برابرې شوې دي، وکتل شوې او د علمي مطالعاتو د ترسره کولو لپاره مناسبې نمونې وټاکل شوې.
د کمېټې غړو ټینګار وکړ، چې د لابراتواري علمي مطالعاتو او تحلیلونو ترسره کول کولای شي، د موادو په لا دقیق پېژندنه، د اثارو او ساختماني موادو د مشخصاتو او ځانګړنو په ټاکلو، د تاریخي او لرغونو دورو په تشخیص او د هېواد د لرغونو ساحو او تاریخي آبداتو اړوند د علمي اسنادو په بشپړولو کې اغېزمن تمام شي.
په پای کې، د اړوندو علمي او مسلکي ادارو ترمنځ پر لا زیاتې همغږۍ، د فرهنګي میراثونو د ارزونې او ساتنې په بهیر کې د علمي او مسلکي اصولو پر رعایت او د ترسره شویو پرېکړو پر تعقیب ټینګار وشو.
۱۴۴۸/۴/۱۷ هـ ق
