بلخ کې د ۱۷ مې ګڼې فرمان د تطبیق، نشهیي توکو او د انساني قاچاق د مخنیوي په موخه غونډه وشوه
د بلخ ولایت په مرکز مزارشریف ښار کې د بلخ اطلاعاتو او فرهنګ ریاست او د البرز علمي او فرهنګي ادارې لوري په یوې سترې ولسي غونډه کې د مشرتابه(حفظه الله) د ۱۷ مې ګڼې فرمان پر تطبیق، د نشهیي توکو د مخنیوي او د افغانستان اسلامي نظام څخه د ولسي ملاتړ پر اهمیت خبرې وشوې.
د غونډې ګډونوالو د یاد فرمان د محتوا د عملي کولو، په ټولنه کې د عامه پوهاوي د کچې لوړولو، د نشهیي توکو د ناوړه اغېزو پر وړاندې د مبارزې او د اسلامي نظام د ملاتړ په برخه کې د ولس پر مسؤولیتونو ټینګار وکړ.
د بلخ ولایت د اطلاعاتو او فرهنګ رئیس مولوي محمدالله ضرار د مشرتابه (حفظه الله) د ۱۷مې ګڼې فرمان د احکامو د عملي کېدو پر اهمیت خبرې وکړې او ویې ویل: د یاد فرمان د موخو د تحقق لپاره د عامه پوهاوي لوړول او د ټولنې د بېلابېلو قشرونو همکاري اړینه ده. ښاغلي ضرار همدارنګه د نشهیي توکو د ناوړه پایلو په اړه د خلکو د پوهاوي پر زیاتوالي او د اسلامي نظام د ملاتړ په برخه کې د ولس پر رول ټینګار وکړ.
ورته مهال د بلخ ولایت یو شمېر دیني علماوو او قومي مشرانو هم د یاد فرمان د محتوا د تطبیق پر اهمیت خبرې وکړې او د نشهیي توکو د مخنیوي، د ټولنیزو مسؤولیتونو د ادا کولو او د هېواد د ثبات او پرمختګ لپاره یې د اسلامي نظام له مسوولينو سره د ولس پر همکارۍ ټینګار وکړ.
۱۴۴۸/۵/۵ هـ ق
