د مټاخان ولسوالۍ اړوند (رشکي غونډۍ) کې لسګونه قلمه لرغوني آثارکشف شول
د اطلاعاتو او فرهنګ وزارت د لرغونپېژندنې ریاست مسلکي پلاوي د پکتیکا ولایت د مټاخان ولسوالۍ اړوند په «رشکي غونډۍ» لرغونې سیمه کې لرغونپېژندې څېړنې ترسره کړې، چې د دغو کیندنو په پایله کې د ودانیزو پاتېشونو ترڅنګ ۸۴ قلمه منقول لرغوني (ډبرو، خټو، هډوکو، ښیښو او فلزي توکي څخه جوړ) آثار ترلاسه شول.
د لومړنیو څېړنو له مخې کشف شوي آثار د کوشاني او کوشاني-ساساني دورو پورې تړاو لري، چې تاریخي مخینه یې د میلادي له لومړۍ څخه تر څلورمې میلادي پېړۍ پورې رسېږي.
د لرغونپوهانو په وینا د موندل شویو آثارو له مخې دغه سیمه د خټينو لوښو د جوړولو د کارخونې په توګه کارېدله.
د اطلاعاتو او فرهنګ وزارت اړوند د لرغونپېژندنې رئیس سید ذبیحالله سادات چې د کیندنو او څېړنو بهیر یې له نږدې څاره، د دغو موندنو له پایلو خوښي څرګنده کړه او ویې ویل: کشف شوي آثارو د اسنادو جوړولو، ثبت او راجستر کولو د پروسې له بشپړېدو وروسته د پکتیکا ولایت د اطلاعاتو او فرهنګ ریاست ته وسپارل شول او غیرمنقول آثار هم په معیاري ډول خوندي کړل شول.
ښاغلي سادات زیاته کړه، د دا ډول فعالیتونو ترسره کول د تاریخ پټو او ناڅرګندو برخو روښانولو ترڅنګ د موزیمونو د بډاینې لامل ګرځي، خلک له تېر تاریخ او فرهنګ سره لا ښه اشنا کوي او د سیمې اوسېدونکو ته د کار زمینه هم برابروي.
۱۴۴۷/۱۲/۶ هـ ق
