د کتاب ارزونې کمېسیون نوبتي غونډه وشوه
دوشنبه (۱۴۴۷ د ذوالحجه ۲۹مه) د اطلاعاتو او فرهنګ وزارت د خپرونو چارو معینیت اړوند د کتاب ارزونې کمېسیون نوبتي غونډه د خپرونو چارو معین مهاجر فراهي په مشرۍ وشوه.
په دې غونډه کې د یو شمېر کتابونو په اړه پرېکړې وشوې او هغه کتابونه چې د اسلامي او افغاني ارزښتونو سره سم لیکل شوي وو، د چاپ اجازه یې ترلاسه کړه، همدارنګه د ۱۳۱ بېلابېلو عنوانونو درلودونکي ۱۸۷۷ ټوکه صادره او وارد شویو کتابونو په اړه هم لازمې پرېکړې وشوې او ۱۳ ټوکه راجع شوي کتابونه د کمېسیون غړو ته وسپارل شول، ترڅو، په راتلونکي ناسته کې یې راپور وړاندې کړي.
دغه راز د قرآن کریم د تفسیرونو او بېلابېلو نسخو په اړه پرېکړه وشوه چې د لا زیاتې ارزونې او قانوني پړاوونو د بشپړولو په موخه د ارشاد، حج او اوقافو محترم وزارت ته واستول شي، همدارنګه د جاپان سفارت اړوند فایلونه او بروشورونه و ارزول شول او په اړه یې لازمې پرېکړې ونیول شوې.
په پای کې، د کمېسیون رئیس او غړو د خصوصي خپرندویانو او کتاب پلورونکو له استازو سره لیدنه وکړه او د شته ستونزو او ننګونو په اړه یې بحث او د نظرونو تبادله وکړه. په دې ناسته کې، د همکارۍ لپاره د چمتووالي د څرګندولو ترڅنګ، د نشراتو چارو د معینیت له لوري اړوندو څانګو ته لازمې لارښوونې وشوې، ترڅو د مطرح شویو ستونزو د حل لپاره لازم اقدامات ترسره شي.
۱۴۰۵/۳/۲۵ ھـ ل
