ګرشک کې لسګونو تنو بېوزلو زده کوونکو ته د وړیا زده کړو زمینه برابره شوه

د هلمند د اطلاعاتو او فرهنګ ریاست اړوند د ګرشک ولسوالۍ د اطلاعاتو او فرهنګ مدیریت ښوونیز مرکز کې د درېیمي دورې لپاره ۱۰۰ تنو بېوزلو زده کوونکو ته د کمپیوټر پروګرامونو وړیا زده کړو زمینه پیل برابره شوه.
د ګرشک ولسوالۍ د اطلاعاتو او فرهنګ مدیر وویل: په دغه ښوونیز مرکز کې د کمپیوټر برخي زده کوونکو ته د عملي کار لپاره مجهز کمپیوټر لیب هم ترتیب شوی دی، ترڅو زده کوونکي د نظري زده کړو ترڅنګ عملي زده کړې هم وکړي. د ګرشک ولسوالۍ د اطلاعاتو او فرهنګ مدیر له ټولو زده کوونکو څخه وغوښتل چي خپلو درسونه ته پر وخت حاضر او خپل وخت په بې ګټو مصروفیتونو کې تېر نکړي.
ورته مهال د یاد ښوونیز مرکز زده کوونکي د ګرشک ولسوالۍ د اطلاعاتو او فرهنګ مدیریت له خدماتو څخه خوښي څرګندوي او له یاد مدیریت څخه غواړي چې ورته پروګرامونو ته پراختیا ورکړي.
د یادونې وړ ده، چې تر دې وړاندې له یاد ښوونیز مرکز څخه ۱۵۷ تنه زده کوونکي د کمپیوټر بېلابېلو پروګرامونو له زده کړو څخه فارغ شوي دي.

۱۴۴۸/۲/۲۷ هـ ق