د رسنیو له مسؤلینو، خبریالانو او د امارتي ادارو له ویاندویانو سره د همغږۍ ناستې وشوې
د پروان، هلمند او بامیانو ولایتونو د اطلاعاتو او فرهنګ ریاستونو له لوري د رسنیو له مسؤلینو، خبریالانو او د امارتي ادارو له ویاندویانو سره د همغږۍ جلا جلا ناستې وشوې.
دغې ناستې د رسنیو او ادارو ترمنځ د همکاریو او اړیکو د پراختیا او پیاوړتیا او د رسنیو د فعالیتونو اړوند موضوعاتو د ارزونې په موخه ترسره شوې.
د اطلاعاتو او فرهنګ ریاستونو مسؤلینو د اطلاعاتو او فرهنګ ریاست او د رسنیزې ټولنې ترمنځ د همغږۍ پر اهمیت ټینګار وکړ او ویې ویل: د اطلاعاتو او فرهنګ ریاست او د رسنیو ترمنځ د همکارۍ او همغږۍ زمینه برابره شوې ده او هڅې کېږي، چې د رسنیو او خبریالانو ستونزو او وړاندیزونو ته رسېدنه وشي.
ورته مهال نورو ګډونوالو هم د عامه افکارو جوړولو او ساتلو کې د رسنیو رول مهم یاد کړ او ویې ویل: رسنۍ په ټولنه کې ستر مسؤلیت لري او خبریالان باید تر هر څه وړاندې له خپل وطن او خلکو سره رښتیني واوسي.
ګډونوالو په دغه ولایتونو کې د رسنیزو فعالیتونو لپاره د برابرې شوې زمینې ستاینه وکړه او د یو شمېر مهمو موضوعاتو په اړه یې خپل نظرونه شریک کړل، دوی همدارنګه د رسنیو د کارکوونکو پر ظرفیت لوړونې او د مسلکي وړتیاوو پر پیاوړتیا ټینګار وکړ.
په پای کې، ویاندویانو او د رسنیو استازو د رسنیزو فعالیتونو د ښه والي او د اړوندو بنسټونو ترمنځ د همغږۍ د پراختیا په اړه خپل نظرونه او وړاندیزونه هم د ناستو له ګډونوالو سره شریک کړل.
۱۴۴۸/۵/۲۰ هـ ق