د رسنیو له مسؤلینو، خبریالانو او امارتي ادارو له ویاندویانو سره د همغږۍ غونډه وشوه

د نورستان ولایت د اطلاعاتو او فرهنګ ریاست مسؤلینو د رسنیو له مسولینو، خبریالانو او د امارتي ادارو له ویاندویانو سره د همغږۍ غونډه وکړه.
د اطلاعاتو او فرهنګ رئیس مولوي نجيب الله حنيف د رسنيو د ارزښت په اړه خبرې وکړې او دوی سره یې د پوره همکاریو ډاډ څرګند کړ، نوموړي زیاته کړه، چې فکرونه د رسنیو له لارې پراختیا مومي او ولس ته د ښه ذهنیت ورکولو په برخه کې رسنۍ مهم رول لري.
ښاغلي حنیف خبریالانو ته اړینې سپارښتنې وکړې او ویې ویل: ټول خبریالان باید هڅې وکړي چې واقعیتونه خپاره کړي او د ناوړه او ناسمو تبلیغاتو مخنیوی وکړي.
په نورستان کې د خبريالانو خونديتوب ولايتي کميټې مسوول د يادو ناستو په دوام ټينګار وکړ او زياته يې کړه چې په نورستان کې د ښې همغږۍ له امله خبريالان له کومې ستونزې سره نه دي مخ شوي.
د ناستې په لړ کې د رسنیو مسؤلینو، خبریالانو او ویاندویانو خپلې ستونزې، نظرونه او وړاندیزونه هم شریک کړل، چې د مسؤلینو له لوري د ستونزو د حل او وړاندیزونو ته د رسیدو ډاډ څرګند شو.

نېټه: ۱۴۴۸/۴/۲۱ هـ ق