د لرغون پېژندنې کمیټې ناسته ترسره شوه

د اطلاعاتو او کلتور وزارت اړوند د لرغون پېژندنې رئیس سید ذبیح الله سادات په مشرۍ د لرغون پېژندنې کمیټې ناسته د دې کمېټې د نورو غړو په شتون کې د هېواد د منقولو او غیر منقولو لرغونو آثارو د ساتنې او خونديتوب د څرنګوالي په موخه ترسره شوه.
لرغوني آثار د ارزښتمنو فرهنګي او تاریخي زیرمو په توګه د هېواد د خلکو هویت او تاریخ انځوروي، له همدې امله د دغو اثارو ساتنه او پالنه یوازې یو ملي مسوولیت نه دی، بلکې د افغانستان د غیور ولس او دولت ګډه دنده ده.
د لرغون پیژندنې رئیس سید ذبیح الله سادات د عالیقدر امیر المومنین حفظه الله تعالی (۱) شمېرې فرمان باندې ټینګار وکړ، چې پکې د هېواد د لرغونو ساحو پر اهمیت، ساتنې او خوندیتوب ټینګار شوی دی.
په دې ناسته کې د هېواد له بېلابېلو تاریخي او لرغونو ساحو څخه د موندل شويو آثارو د ساتنې، مدیریت او نندارې په څرنګوالي هم بحث وشو.
همدارنګه د کمیټې غړو د دغو آثارو د ساتنې او پېژندنې په برخه کې پر نويو او اغېزمنو لارو چارو د نظرونو تبادله وکړه، تر څو وکولای شي، چې له دې لارې هم د هېواد د تاریخي او فرهنګي هویت د خونديتوب لپاره مرسته وشي او هم د کورنیو او بهرنیو ګرځندویانو د جذب زمینه برابره شي.
۱۴۴۷/۲/۲۴ هـ ق