د رسنیو له مسؤلینو، خبریالانو او د امارتي ادارو له ویاندویانو سره د همغږۍ ناستې وشوې

د تخاراو کندز ولایتونو د اطلاعاتو او فرهنګ ریاستونو له لوري د رسنیو له مسؤلینو، خبریالانو او د امارتي ادارو له ویاندویانو سره د همغږۍ جلا جلا ناستې وشوې.
د اطلاعاتو او فرهنګ ریاستونو مسؤولینو د رسنیو او خبریالانو د فعالیتونو په اړه خبرې وکړې او د رسنیو، خبریالانو او ادارو ترمنځ یې د همغږۍ او ګډې همکارۍ پر پیاوړتیا ټینګار وکړ.
په دغو ناستو کې ویناوالو د رسنیو د اهمیت په اړه خبرې وکړې او ویې ویل: رسنۍ خلکو ته د عامه پوهاوي، د عامه افکارو په روښانولو او د اسلامي ارزښتونو په سمه توګه لېږدولو په برخه کې مهم رول لري. دوی د رسنیو ستونزې واوریدې او زیاته یې کړه، چې اړوندې ادارې به د دغو ستونزو د حل او وړاندیزونو ته د رسیدو په برخه کې پوره هڅې وکړي.
د دغو ناستو ګډونوالو د رسنیو او خبریالانو د ستونزو د حل، د حکومتي ادارو او رسنیو ترمنځ د ګډې همکارۍ د دوام، د همغږۍ د پیاوړتیا او د کاري بهیر د لا ښه والي په موخه پر دوامدارو ګډو همکاریو ټینګار وکړ.

۱۴۴۸/۵/۲۳ هـ ق