د اطلاعاتو او کلتور وزارت د سیاحتي، تاریخي او فرهنګي ځایونو ساتنې ته ژمن دی

دوشنبه(۱۴۴۷ شوال المکرم ۱۹مه) دغه څرګندونې د اطلاعاتو او کلتور وزارت د ګرځندوی، مالي او اداري معین مولوي قدرت الله جمال د لغمان ولایت قرغیو ولسوالۍ قومي مشرانو سره په لیدنه کې وکړې.
په دې لیدنه کې د لغمان ولایت قرغیو ولسوالۍ قومي مشرانو په هېواد کې د سیاحتي، تاریخي او فرهنګي ځایونو د ساتنې او بیارغونې له امله د اطلاعاتو او کلتور وزارت څخه مننه وکړه او ویې ویل: د قرغیو ولسوالۍ ټول ولسونه له اسلامي امارت سره د تل په څېر همکار دي او پوره ملاتړ یې کوي.
قومي مشرانو قرغیو ولسوالۍ کې د سیاحتي، تاریخي او فرهنګي ځایونو په برخو کې شته ستونزې او وړاندیزونه د ګرځندوی، مالي او اداري معین سره شریکې کړې.
ورته مهال د ګرځندوی، مالي او اداري معین مولوي قدرت الله جمال په افغاني ټولنه کې د قومي مشرانو رول په اړه خبرې وکړې او ویې ویل: د ګرځندوی سکتور پیاوړتیا په برخه کې قومي مشران او په ټوله کې ولسونه مهم رول لري، چې د ولسونو په همکارۍ سره هېواد کې د ګرځندوی سکتور په ښه توګه پیاوړی کېدای شي.
ښاغلي جمال د قرغیو ولسوالۍ د سیاحتي، تاریخي او فرهنګي ځایونو په برخه کې د شته ستونزو د حل او وړاندیزونو ته د رسېدو پوره ډاډ څرګند کړ او ویې ویل: چې د اطلاعاتو او کلتور وزارت د سیاحتي، تاریخي او فرهنګي ځایونو ساتنې او بیارغونې ته پوره ژمن دی.