نیمروز کې د ژورنالیستانو فکري، عقیدوي او د مسلکي ظرفیت لوړونې یو ورځنی سیمینار ترسره شو
د اطلاعاتو او فرهنګ وزارت د خپرونو چارو معینیت له لوري د نیمروز د اطلاعاتو او فرهنګ ریاست په همکارۍ، د خپرونو چارو معین ښاغلي مهاجر فراهي په شتون کې د ژورنالیستانو د فکري، عقیدوي او مسلکي ظرفیت لوړونې یو ورځنی سیمینار ترسره شو.
د نیمروز د اطلاعاتو او فرهنګ رئیس مفتي حبیب الله الهام د ژورنالیستانو د شرعي مسؤلیتونو په اړه خبرې وکړې او ویې ویل: هغه ژورنالیست چې پر اسلامي عقیده سمبال وي، حقایق په امانتدارۍ او رښتینولۍ رسنیز کوي، د خپل مسلکي مسؤلیت ترڅنګ شرعي مسؤلیت هم په غوره توګه ادا کوي.
همدارنګه د خپرونو چارو معین صاحب وویل: هغه ځوانان چې په ټولنیزو رسنیو کې فعاله دي، په ریښتیني توګه باید زیار وباسي او کار وکړي. لکه څنګه چې په نظامي جګړې کې د سنګر ساتنه فرض ده، همداسې د رسنیز ډګر ساتنه هم فرض ده، چې دې برخه کې باید ټول په پوره اخلاص کار وکړو.
د ښاغلي فراهي په وینا؛ رسنۍ باید د ټولنو واقعیتونه په متوازنه توګه انعکاس کړي او د خلکو په ذهنونو کې غیر واقعي هیلې رامنځته نه کړي، ځینې بهرنۍ رسنۍ په ظاهره د ښکلو پیغامونو تر شا داسې محتوا خپروي چې د ټولنې پر یووالي منفي اغېز کوي او د افغانانو ترمنځ تعصبونو ته لمن وهي.
دغه راز پر ټولیزو رسنیو د څار رئیس مولوي صفي الله رائد وویل: د اسلام او هېواد دښمنانو نظامي جګړې کې ماته خوړلې او اوس یې فکري جګړې ته مخه کړې ده، دا چې د فکري جګړې مهم وسایل ټولنیزې رسنۍ دي، ژورنالیستان او ځوانان مو باید له دغو رسنیو څخه په اغیزمنه توګه استفاده وکړي. نوموړي همدارنګه د اسلامي، ملي او ټولنیزو ارزښتونو پر رعایت او د خبرونو تر خپرولو مخکې د خبر خپرولو د پایلو پر ارزونې ټینګار وکړ.
نورو ویناوالو هم د رسنیو د ارزښت په اړه خبرې وکړې او ویې ویل: اطلاعاتو ته پر وخت او په اسانۍ سره لاسرسی د حقایقو او کره معلوماتو د خپرېدو او د ناسمو تبلیغاتو د مخنیوي په برخه کې مهم رول لري. ویناوالو د ژورنالیستانو او د رسنیو د مسؤلینو علمي ظرفیت لوړونې په موخه د دا ډول سیمینارونو د جوړېدو له امله خوښي څرګنده کړه او په راتلونکي کې یې هم د ورته سیمینارونو د جوړېدو غوښتنه وکړه.
۱۴۴۸/۶/۳ هـ ق
